टोकियो ओलम्पिक : पौडीका एलेक्सद्वारा आफ्नै राष्ट्रिय कीर्तिमान भंग


Harek Pal July 28, 2021

काठमाडौँ । जापानको राजधानी टोकियोमा जारी ३२औँ ग्रीष्मकालीन ओलम्पिक खेलकुदमा नेपालका पौडी खेलाडी एलेक्स शाहले आफ्नै राष्ट्रिय कीर्तिमान भंग गरेका छन् ।

पुरुष १०० मिटर फ्रिस्टाइलमा उनी आफ्नो हिटमा पहिलो भएपनि अर्को चरणमा भने पुग्न सकेनन् । शाह निर्धारित दूरी ५३ दशमलव ४१ सेकेण्डमा पूरा गर्दै आफ्नो हिटमा पहिलो भए ।

यसअघि उनको नाममा ५४ दशमलव १३ सेकेण्डको राष्ट्रिय कीर्तिमान थियो । शाहले सो कीर्तिमान नेपालमा सम्पन्न १३औँ दक्षिण एसियाली खेलकुद (साग) मा बनाएका थिए ।

शाह सहभागी हिटमा कोसोभोका खेलाडी दोस्रो, प्यालेस्टाइनका तेस्रो, गुएनाका चांैथो, भुटानका पाँचौ, माल्दिभ्सका छैटौँ र सोलोमन आइल्यान्डका खेलाडी सातौँ भए । पुरुष १०० मिटर फ्रिस्टाइलमा ७० खेलाडीले प्रतिस्पर्धा गरेका थिए ।

नेपालका शाह ५९औँ स्थानमा रहे । पौडीकी अर्की खेलाडी गौरिका सिंहले महिला १०० मिटर फ्रिस्टाइलमा आज प्रतिस्पर्धा गर्नेछिन् ।

नेपालबाट चार खेलमा पाँच खेलाडी टोकियो ओलम्पिकमा सहभागी भएका छन् । तिमध्ये सुटिङकी कल्पना परियार र जुडोकी सोनिया भट्ट यसअघि नै प्रतियोगिताबाट बाहिरिएका छन् ।

परियारले महिला १० मिटर एयर राइफलमा तथा भट्टले महिला ४८ किलो तौल समूहमा प्रतिस्पर्धा गरेका थिए । टोकियो ओलम्पिकमा अब पौडीकी सिंहका साथै एथलेटिक्सकी सरस्वती चौधरीले प्रतिस्पर्धा गर्न बाँकी छ । चौधरीले शुक्रबार प्रतिस्पर्धा गर्नेछिन् ।